غوغل كتستعد تطلق أول نسخة بيتا من Android 17، وهاد الشي كيبيّن تغيير فالعادات ديالها حيث قررات تحيد مرحلة “Developer Preview” اللي كانت كتسبق الإطلاق عادةً.
ومن المنتظر أن النسخة التجريبية توصل فالأسبوعات الجاية لمستعملي هواتف Pixel. النسخة الجديدة يُرتقب أنها تجيب واجهة مجددة وعصرية أكثر، مع مميزات جديدة فالتخصيص.
أما الإطلاق الرسمي النهائي، فمتوقع يكون فصيف 2026.
عارفين أن غوغل بدلات الطريقة ديالها فإطلاق التحديثات، وهاد الشي غادي يبان مع إطلاق Android 17. من قبل، كانت الشركة كتدير العملية على مراحل: كتبدا بـ Developer Previews الموجهة للمطورين باش يجربو التطبيقات ديالهم بكري على النظام الجديد، ومن بعد كتطلق نسخ بيتا، وفالأخير النسخة المستقرة النهائية. هاد الشي داروه حتى مع Android 16، اللي خرج فالنسخة النهائية ديالو فـ يونيو 2025، يعني سبعة شهور من بعد أول Developer Preview.
ولكن مع Android 17، الأمور تبدلات. ما كان حتى Developer Preview هاد المرة، حيث غوغل ولات كتركز على منصة تجارب داخلية سميتها Canary. وبهذا الشكل، Android 17 غادي يبدا مباشرة بنسخة بيتا.
وحسب فريق Android Beta اللي تكلم فـ Reddit، أول بيتا قريبة بزاف. دابا راه متوفرة بيتا ديال Android QPR3 2.1 (تحديثات فصلية)، والفريق وضّح أن التسجيل فبرنامج Android 16 QPR غادي يخلي أصحاب هواتف Pixel يتوصلو بالنسخة النهائية ديال Android 16 QPR3، ولكن كذلك غادي يتوصلو بـ Android 17 Beta 1.
بمعنى آخر، أول بيتا ديال Android 17 غادي توصل فالأسبوعات الجاية، تقريباً عام من بعد أول بيتا ديال Android 16 اللي كانت فـ 23 يناير 2025. وفنفس الوقت، فريق Android Beta أكد أن نهاية دورة بيتا ديال Android 17 غادي تكون فـ يونيو 2026. يعني غوغل ما سرعتش الوتيرة مقارنة مع 2025، ومن المتوقع نشوفو أول هواتف Pixel خدامين بـ Android 17 تقريباً فشهر غشت 2026.
دابا، مازال ما كايناش معلومات كثيرة على Android 17. ولكن كاين كلام على واجهة جديدة وعصرية أكثر، مع لوحة إشعارات وإعدادات أسهل فالوصول، وتصميم فيه شوية ديال الشفافية. كذلك متوقعين مزايا جديدة خاصة بألعاب الموبايل، وإضافة Widgets يمكن الوصول ليها مباشرة من شاشة always-on display.
إلى بغيتي تسجّل فبرنامج البيتا ديال غوغل، خاصك غير تمشي لصفحة البرنامج فموقع غوغل، بشرط يكون عندك هاتف Pixel متوافق. ولكن خاصك تعرف أن نسخ البيتا ماشي نهائية، وممكن يكونو فيها أخطاء ومشاكل حتى يتم إصلاحها قبل الإصدار الرسمي. لذلك، خاصك تفكر مزيان إلا كنت غادي تستعملها فالهاتف الرئيسي ديالك.
وأخيراً، إلا كنت مهتم غير ببيتا ديال Android 16، خاصك تخرج من برنامج البيتا دابا، وإلا غادي يوصلك Android 17 Beta 1 أوتوماتيكياً.